Thursday, September 25, 2008

كل سنة واحنا طيبين


اجمل حاجة انك تسمع كلمة كل سنة وانت طيب بجد بفرح اوى اما بسمعها او بقولها بحس ان فى تسامح كتير بيملانى حتى لو متضايقة من الشخص اللى بيقولهالى ساعتها بحس انى خلاص مش متضايقة خصوصا فى ايام جميلة زى اللى احنا فيها دى كل ماتمناه ربنا يوفقنا السنة دى هى اخر سنة فى الكلية سنة 6 اتمنى من ربنا يكرمنى انا وكل اصحابى وكل زمايلى كانت سنة تقيلة اوى فعلا واوشكت على الانتهاء كل سنة وهما طيبين وربنا يوفقهم ويوفقنى اتمنى ان كل الناس تكون بتدعيلى اما تفتكرنى وميكونش حد زعلان منى واى حد زعلان منى او متضايق منى فى حاجة اتمنى انه يسامحنى ربنا يعيد علينا الايام دى بخير ياجماعة ويكرمنا يأكتر ثواب فيها

Sunday, June 15, 2008

اكيد هو ده العد التنازلى













بقالى كتير اوى مدخلتش مدونتى ووحشتنى اوى
بس فى عالم سنة 6 طب لازم اى حاجة توحشنا احنا الطلبة
والا منبقاش فى طب

وكمان وحشنا حاجات كتير اوى

زى حاجة جميلة اوى انى ادخل هنا مثلا واتكلم براحتى من غير

ماتلاقى حد ودنه وجعته من كلامك وخد بعضه ومشى

وسابك تكلم نفسك

وعشان وحشنى شعور انى اتكلم وحد يسمعنى مش لازم يعرفنى

فقط يسمعنى ووقت مايحب يمشى بردوا يمشى بس انا مش هعرف انه مشى

المهم انا عملت جو مناسب للجلسة دى

ليل مظلم وطفيت الاضواء فى حجرتى

وكمان مفيش مانع نقفل الباب منعا لسماع الضوضاء بره

واخواتى بيتنافسوا مين فيهم يعلى صوته اكتر ياترى مين هيكسب

وكمان عبد الوهاب بتأثيره فى الضلمة دى

انا حسه انى هحضر عفريت مش هقعد اكتب شوية

بس عبد الوهاب بيغنى النهر الخالد
(مسافر زاده الخيال والسحر والعطر والظلال)رائع فعلا مهما كان قديم

واجمل فيه انه يخلى الانسان يتعود على الوحدة

زمان كنت بعتبر الوحدة دى شئ فظيع واسؤا شئ ممكن

اتعرضله انى ابقى لوحدى وبعيد عن الصخب والناس

بس دلوقتى عرفت ان الوحدة نعمة كبيرة اوى

حتى لو كانت دائمة هى دايما فيها نوع من الرحمة

سواء رحمة من الاختلاط اللى مليان بالمشاكل

وخاصة لو اكتشفت انك كتير اوى تتنازل عن كبريائك لحد مايستاهلش

ربما ان معانى الصداقة والمودة فقدت من زمان ومعدش المعنى الحقيقى موجود كتير

اعتقد ان سوء النية بين الناس عامل رئيسى فى الخلاف الدائم بينهم

لكن الصداقة الحقيقة موجودة والحمد لله على الرغم من كل ده

وهى اللى لما تقارنها بالمعرفة المبنية على سوء الفهم

تخيل ان حد يعرف حد علشان طول النهار يفضلوا يقولوا بعض لا-لا-لا-لا-

شئ مستفز انا دلوقتى مش عارفة تبقى فين المودة والعلاقة الروحية اللى بينهم

بتدوب دايما فى الاستفزاز والعند والرغبة من كل شخص ان يتحكم ويفرض اسلوبه

واكيد مفيش حد بيقبل ده

ومن هنا تنتهى علاقة كان ممكن تستمر فقط لو الصدقين استبعدوا من علاقتهم العند

لسه عبد الوهاب بيكمل

لكن على الرغم من كل ده مش هو ده اللى بيزعلنى
مش ان العلاقة انتهت اى علاقة ممكن تنتهى بموت احد الطرفين
وده طبعا بيبقى قدر وبنتعود عليه ونحتفظ بمشاعرنا للشخص ده
اللى بيزعلنى ان الود يتحول لخصام ومشاعر سيئة او عدم مشاعر خالص

وده اسوأ

التجاهل

كل طرف يتجاهل التانى عن عمد ويقصد يؤذى مشاعره

وخصوصا لو احد الاطراف عنيد ومتصلب الرائ حتى لو مش على حق

للاسف يضطر الاخر انه يعامله بنفس معاملته على الرغم من اختلاف الاسلوب فى الحقيقة

الا ان الاتنين لما اتفقوا كان اتفاق فى الاسلوب السئ

يعنى نختلف فى مشاعر الصداقة ونضيعها

لكن لما نيجى نغيظ بعض او نعامل بعض بطريقة سخيفة وعن عمد نتفق اوى فى الاسلوب

كلها تصرفات طفولية اسمعها كتير اوى العبارة دى

وخصوصا لو تحكى لحد من الكبار سنا
يقولك حركات عيال

ومع احترامى لكلام الكبار

الا انى اختلف معهم فى التفسير

اولا احنا لم نعد صغار

ثانيا اعرف ان الاطفال يتميزوا بطيبة القلب والنقاء

وبطبيعتهم لما يزعلوا بيتصافوا علطول وينسوا

على عكس الكبار كل مابيزيد السن القلب نقاؤه بيروح

بيغطيه غلاف من الاتربة يصعب ازالتها

ويفقد نقاؤه وطيبته

ويصبح من السهل جدا اتنين كانوا اصحاب اوى النهاردة

تانى يوم تلاقيهم بيتعمدوا يحرقوا دم بعض اليوم اللى بعده

لكن ايه الحل فى كده

بصراحة الموضوع موجود قدامى
ولكن انا شايفة ان الحل عمره ماهيكون ان الواحد يفقد الثقة

لا فى رحمة ربنا ولا فى نفسه ولا فى الناس

زمان حصل معايا الموقف نفسه وكدت افقد الثقة فى نفسى

واعتقدت انى عندى مشكلة فى التعامل مع الناس وانااكيد انا اللى غلطانة

فكرت بطريقة غريبة

محطيتش فى دماغى ان حد ممكن يكون غلطان غيرى

وقلت ابعد عن الناس احسن

لكن الحمد لله وجود صديقاتى معايا ادانى ثقة تانى فى نفسى

واقنعونى ان اهم حاجة هى ثقة الواحد فى ربنا وفى نفسه مادام على حق

لكن هى دى المشكلة ياجماعة

وهو مين بيعترف انه غلطان






بحاول دايما ابقى صح واسال اللى يفهم عن مواقف وهل انا مخطئة

لكن كل واحد بيعمل كده ومش صعب كل واحد يتمسك برأيه بالطريقة دى

يعنى مشاكل اللى بين الاصدقاء دى واللى انتهت بفرقة ملهاش لازمة

كان مين الغلطان محدش بيقدر يحكم بالعدل فيها

كل واحد هيحكى الموقف من وجهة نظره وهيوصف صدمته فى اللاخر بطريقته

حسب رؤية كل واحد بيبنى قصة ويرتب عليها الموقف اللى فى مخيلته

لكن متعرفش ابدا مين الصح

عبد الوهاب خلص وبدا يقول من غير ليه الراجل ده صوته بالفعل ساحر
وده ليه ياترى يجرالى اللى جرى وافضل افكر)ده هو اللى بيقول مش انا طبعا)

لكن طبعا زى كل مرة افكر فى حل لحاجة زى دى

ويكون هو الفراق بين الشخصين بعد مابدا كل واحد فيهم فى تجريح التانى

وهو الشرخ اللى لايمكن بيتنسى ابدا
الان لم يعد من حق الاتنين يسلموا على بعض

ولا حد منهم يطمن على اخبار التانى ويساعده فى حل مشكلاته
كل ده عشان واحد منهم اصر ان الموضوع يبقى كرامة والدفاع عنها
والعناد فى تلك المنطقة ممنوع ونهايته واحدة
نهاية للصداقة زى مالبتر بيريح صاحب الساق المؤلمة من المها
طبعا انا عارفة ان مفيش حل للمواقف دى

فقط كنت بتكلم قبل مااصل لتقطيع شعرى من التفكير
كل اللى اتاكدت منه بجد

ان الصداقة نادرة اوى اوى

ومش كل صديق هو بالفعل صدوق

لا اجد فكرة افضل من تحديد العلاقات الى حد معين مع الناس

والاكتفاء الذاتى كل بصديقه مش لازم نوسع دايرة الصداقات

لانها غالبا بتفشل وتسبب فترة من الضيق والحزن
يخسارة

(خايف طيور الحب تهجر عشها وترحل بعيد خايف على بحر الدفا ليلة شتا يصبح جليد
خايف لبكره يجينا ياخدنا من ليالينا
سكة عذاب تاه فيها احباب احباب كتير قبلينا)
وده بردوا عبد الوهاب اللى بيكمل معايا
هو كمان خايف باين
ربنا يستر بقى
ياترى فين الصح؟؟؟؟؟

Tuesday, January 22, 2008

فى عينيك عنوانى





هى من اجمل ماقرات للشاعر /فاروق جويده


فى عينيك عنوانى



قالت : سوف تنسانى
وتنسى أننى يوماً
وهبتك نبض وجدانى
وتعشق موجة أخرى
و تهجر دفء شطآنى
وتجلس مثلما كنا
لتسمع بعض ألحانى
و لا تعنيك أحزانى
و يسقط كامنى اسمى
و سوف يتوه عنوانى
ترى .. ستقول يا عمرى
بأنك كنت تهوانى ؟!!



فقلت : هواك إيمانى
ومغفرتى وعصيانى
أتيتك والمنى عندى
بقايا بين أحضانى
ربيع مات طائره
على أنقاض بستان
رياح الحزن تعصرنى
وتسخر بين وجدانى
أحبكِ واحة هدأت
عليها كل أحزانى
أحبكِ نسمة تروى
لصمت الناس .. ألحانى
أحبكِ نشوة تسرى
وتشعل نار بركانى
أحبكِ انتِ يا أملاً
كضوء الصبح يلقانى
أماتَ الحب عشاقا
وحبكِ انتِ أحيانى
و لو خيرت فى وطن
لقلت : هواكِ أوطانى
و لو انساكى يا عمرى
حنايا القلب .. تنسانى
إذا ما ضعت فى درب
ففى عينيك .. عنوانى

Thursday, January 17, 2008

شئ من بعيد


شئ من بعيد نادانى واول ما نادالى جرالى ماجرالى

نادانى من يمينى ولسه بينادينى بيقولى حصلينى على بلد العجايب

نادانى من شمالى ايام والمهر غالى تعالى اوام تعالى

متكئا على اريكة مريحة وسابحا فى بحر من افكارك ماذا يمكنك ان ترى ؟أو بم يمكنك ان تشعر؟ فى جلستى هذى استطعت ان ارى كل مشاكل الحياة من حولى وكل مايربطنى بها وكانه حرملة كبيرة غير جيدة الربط حول عنقى استطيع ان ارانى افك رباطها لأنسل بسهولة من سيطرتها واخرج من تحت طغيانها ارانى الان وقد اصبحت اخف حركة واكثر سرعة ها انا ذا أتواثب من هنا وهناك لا يشغلنى شاغل مرتديه فستان طويل فاتح اللون واعقص شعرى خلف راسى كما كنت عندما كنت طفلة كم اهفو لتلك اللحظات النقية البريئة ولكن بعد ان قيدتنى شئون الحياة ليس لى ذلك الحق الا فى نزهة كهذه فلاستمتع بها اذا اشعر انه يقترب نعم انه يدنو من عالمى ويقترب ولكن ببطء ولكن ماهو لا ادرى ماهو بالضبط ولكنى اشعر باقترابه شئ هو اقرب الى الحلم ولكنه يبدو كالحقيقة يبذر السعادة فى نفسى ولكنه ليس بخيال يرسم البسمة على ثغرى وماهو برسام ومجرد اقترابه من عالمى يجعلنى احلق فى سماء عالية مبتعدة عن ارضى وواقعى هنا قد اقتربت منه لادنو واصبح اقرب اليه وها انا ذا اقترب اكثر فاكثر اراه قادما يبدو ملاكا ولكنه انسان وددت ان احرك قدماى لادنو منه واتفرس ملامحه ورحت احاول واحاول وهنا فقط قررت حرملتى الدنياوية ان تعود وارتديها من جديد ليزول عنى كل هذا واعود من جديد تلك الاخرى التى تقطن الارض وتنظر للسماء تتمنى ان تراه ذلك القريب البعيد وتتوق لمناداة ذلك الشئ الذى ناداها من قبل لتراه ولكن ماهو ياترى ذلك الشئ البعيد ولكن هذه نزهة اخرى اتمنى ان ادركها قريبا

Saturday, December 29, 2007

السادة الاطباء ....شكرا

وعلى غير العادة

انا متفاءلة جدا النهارده

يمكن لان الاجازة قربت(واكيد ده شئ بيخلى شباب مصر كله يتفاءل)

لكن بصراحة بقى انا لاول مرة شفت عملية انقاذ حياة انسان

كاملة وبكل انفاعلات الناس فى الموقف ده

وشفت اطباء بجد اتشرف انهم موجودين فى المهنة دى

وحسيت ان الواحد ميخافش وهم موجودين

بس مش هكمل واقول بقى انى اتمنيت انى ابقى مريضة عشان يعالجونى

لالالالالالا مش للدرجة دى

بس فعلا تملكنى (حلوة اوى تملكنى دى )
شعور بالفخر
وسالت نفسى سؤال

ياترى كل واحد قرر انه يمارس مهنة الطب سال نفسه

انا فعلا جدير بالمهنة دى واقدر انقذ -باذن الله طبعا -حياة انسان وانا قد المسولية ولا لأ؟

وانا اصلا مهتم انى انقذ الارواح المعذبة ولا مش هبقى قد المسئولية؟

انا نفسى مسالتش نفسى بصراحة

بس كنت حبه انى اكبر ابقى دكتورة

البالطو والسماعة وعيادة ولازم طبعا تكون بالعيانين

وبابا وماما يفرحوا لما حد يقولهم يبقوا خلوا الدكتورة تفوت على فلان تشوفه لاحسن تعبان

يعنى الحركات بتاعة الافلام دى

اكيد كل واحد من الى فكر يدخلها كان فى دماغه كده بردوا

بس انا دلوقتى بفكر وقبل مانتخرج بسنة واحدة بس

ياترى انا هبقى قد المسئولية ولا لأ ؟ هل هقدر اخفف الالام الناس ولا هكون سبب فى زيادتها

اللى شفته النهارده فى انقاذ المريض المصاب فى حادث تصادم كان بجد مثال مشرف

مهارة

اهتمام

اتقان

روح الفريق

التعاون لصالح المريض بغض النظر عن اى مناصب

اكيد الوصف مش كفاية بس المنظر كان بجد رهيب

لما تحس ان انسان هيموت قدامك وغارقان فى دمه وبعد شويه

تشوفه منقول فى منظر مطمئن واحسن على سريره وحوله من يهتم لامره

اكيد ده يقرب المنظر شويه

عشان كده حسيت انى عايزة اقول لهؤلاء السادة الاطباء

شكرا-(مش بس على العمل)-

لكن على التمسك بانسانيتهم وادميتهم لحد دلوقتى

فى عصر تحطمت امامه كل الانسانيات





Tuesday, December 18, 2007

يارب يوم سعيد


النهاردة وقفة عرفات من أجمل الايام اللى بحبها فى السنة كلها ان مكنش اجملها على الاطلاق اتمنى من كل قلبى يكون يوم جميل علينا كلنا ويستجيب ربنا لكل داع وعشان كده عندى شوية ادعية جميلة احب تكون معايا علطول وبحب ارددها كتير على سبيل المثال منها: قبل الدعاء
"اللهم ربنا أمرتنا بالدعاء وتوكلت بالاجابة فلبيك اللهم لبيك لبيك لا شريك لك لبيك"
ودعاء اخر سمعت من اكتر من شيخ انه يشتمل معانى كثيرة مما دعا بها الرسول الكريم "عليه افضل الصلاة والتسليم"
ودى طبعا مجرد روايات لكن هو فعلا دعاء معانيه حلوة جدا
:
"اللهم انا نسألك من خير ما سألكمنه نبيك محمد (صلى الله عليه وسلم)ونعوذ بك من شر مااستعاذ منه نبيك محمد (صلى الله عليه وسلم)وأنت المستعان وعليك البلاغ ولا حول ولا قوة الا بك ."

فى كمان دعاء اعتقد معروف لكتير من الناس لكن فضله كبير ان شاء الله
هو استغفارات تسبق الدعاء
""لا اله الا الله لا شريك له ,له الملك وله الحمد , وهو على كل شئ قدير ,الحمد لله , الله اكبر..,سبحان الله ,لا اله الا الله,و لاحول ولا قوة الا بالله"ثم نقول اللهم اغفر لى +الدعاء اللى تفضله _تقول ماتود ان تدعى الله ان يستجيبه لك"


وممكن تسابيح بنعتقد انها بسيطة اجرها يكون عظيم واكبر مما تصور
يعنى أول مرة اعرف ان اجر قول "الحمد لله" مئة مرة يساوى اجر 3 مرات حج

والله اعلم طبعا

وقول "سبحان الله" مئة مرة ايضا يزيد من حساناتنا الف درجة

وافضل الذكر : هو قولنا "لا اله الا الله"
وأفضل الدعاء عندما ندعو الله باسمه الاعظم (وهو من الغيبيات اختص الله العظيم بها نفسه))


ولكن عن بعض الروايات لا ادرى مدى صحتها عن بعض الادعية عن النبى الكريم (ص) قيل ان فيها اسم الله الاعظم

منها :
"اللهم لا اله الا انت المنان بديع السماوات والارض ذو الجلال والاكرام"

واجتهد بعض العلماء فى محاولة معرفة ايها صحيح وعن البعض انه موجود فى ايه الكرسى فى سورة البقرة

وهى كلها مجرد اجتهادات لا احد يعلم مدى صحتها

كمان دعاء عند الكرب والحزن
"لا اله الا الله الحليم الكريم سبحان الله رب العرش العظيم سبحان الله رب السموات السبع ورب العرش الكريم"

من الادعية اللى تشتمل معان رائعة بردوا وخصوصا اليوم ده
الدعاء بالهداية والاستفار والتذلل لله وطلب تبديل ذنوبنا بحسنات
"ياارحم الراحمين برحمتك نستغيث فأغثنا وأبدل سيئاتنا حسنات فأقرر عينى نبينا محمد (صلى الله عليه وسلم)بى وبأمته"

"ربى انت ولى فى الدنيا والاخرة توفنى مسلما وألحقنى بالصالحين"


وبعض علماء الدين يرى ان من الافضل يكون فى اسلوب للدعاء او ترتيب افضل ليه
يعنى مثلا نبدا"ب..... الحمد لله وسلام على عباده الذين اصطفى

2- الصلاة على النبى (صلى الله عليه وسلم)


وربنا يهدينا جميعا ويرزقنا بكل الخير والثواب يارب يكون يوم سعيد لينا كلنا وماننساش ندعى لبعض كلنا أخوة مسلمين عشان ميفوتناش فضل الدعاء بظهر الغيب

لا اله الا الله , الحمد لله , سبحان الله , الله اكبر

"اللهم لا اله الا انت سبحانك انى كنت من الظالمين"

الله ماشفى كل مريض

اللهم ما اغفر للمؤمنين والمؤمنات الاحياء منهم والاموات"

كل سنة وانتوا طيبين وربنا يجعله عيد سعيد على الكل ان شاء الله


Wednesday, December 12, 2007

حب..........وعناد















ألا مفر من تلك الاوهام أحيرة تلك أم شبح للالام

أم هو حب شائك يغزوه فرسان الاوهام

لا أدرى حقا ماذا أفعل فى حب ينمو بلا استسلام

قلها ياقلبى بلا كبر احببته ولكن افقدنى الامان

ولعمرى لا أعرف كيف يجتمع الاثنان

عقلى يخبرنى بانه لاحب بلا أمان

وبأن القلب قد يخطئ لكن العقل هو الربان

فيا لمر التفكير مع قلب ملؤه النيران

نيران حب كالجحيم بلا هوادة تستعر ولا نسيان

فلم ياعقلى تأبى الاعتراف بان فى الحب لقلبى الوئام

وبأنه قد آن الاوان لحبى أن يولد بين عقل وقلب حمام

وبأن قلبى قد تنحى جانبا بكل ماينطق بغير الغرام

.....................

Tuesday, December 4, 2007

ايه مشفتش حرباية قبل كده



هل صادف والتقيت بحرباء!!!!!!!!!!أكيد

الحرباء فى معناها الاصطلاحى معناها الكائن القادر على تغير لون الطبقة الخارجية لجسمه وجعلها مناسبة
للبيئة المحيطة بيه لكى يستطيع الاحتماء والتحايل على ظروف محيطة

التصنيف العلمي للحرباء
المملكة: الحيوانات
الشعبة: الحبليات
الطائفة (الصف): الزواحف
الرتبة: الحرشفيات
تحت رتبة: السحالي
هذا هو ماورد عنها علميا ولكن كالعادة لكل كلمة اكثر من معنى
و هناك معنى لم يرد فى القاموس

الحرباء الحقيقة التى تستحق الاسم عن جدارة

هو كل شخص يتظاهر بشخصية ويخفى بداخله شخصية اخرى

انسان يرتدى امام الناس زى الفضيلة والاخلاق اذا تواجد فى وسط ملئ بهم

وذلك لاستفادة ما فى عقله وهدف يطمح فى الوصول اليه

حتى لو كان الهدف هو ايذاء احدهم او منع الخير عنه(مناع للخير )

ولا يلبث ان ينتزع هذا القناع بعد تحقيق غايته او بعد مايغادر الى وسطه الحقيقى ليكشر عن انيابه ويكشف عن شخصية دنيئة

لاتستحق منا سوى كل احتقار

ماذا عن انسان يمشى متظاهرا بالخجل لا يكاد يرفع عينيه فى وجوه الاخرين

ومن فرط غروره يعطى المواعظ والحكم

وما ان يستدير عنه بعض من يهمه ان يظهر بمظهره هذا امامهم

حتى يكشف عن وجهه الحقيقى المشوه ويهدم كل ماقاله من حكم

ويتناسى مواقفه ونظرات الخجل المصطنع التى كان يجيد اصطناعها

لتتحول لنظرات وقحة تهاجم كل من يوقع به سوء حظه تحت سيف تلك النظرات المجردة


قم يعود ليحدثنا عن المه الشديد وحزنه لتدنى المستوى الاخلاقى الذى الم بالناس

بل ويقارن بين هذا وذاك فى وقاحة منقطعة النظير

ولا بأس ابدا بجلسة موسعة من النميمة على احدهم (ولو بالزور)

مع تنهدات الالم والحسرة على هذه الاخلاق التى تنحل يوما بعد اخر

وماذا عن شخص اخر يلغى كل افكاره ويطيح بها عرض الحائط اذا مكن من مجالسة ومصادقة اخر له

بعض المميزات اللى يطمح الاخر فى بعضها

مما يجعله يتبنى كل اراءه مهما كانت ويشترك معه فى اطلاق تلك الاراء عن لسانه وتعميمها

بحيث تصبح رايا عاما بعد فترة قصيرة وترديد الاشاعات ولو كانت خاطئة

وتسريب اخبار خاطئة وتاكيدها لكل من يسال (على الرغم من امكان مساعدة الاخرين الا انه يضن بمجرد كلمة صادقة تخرج منه)

يتمنى رؤية الاخرين فى حيرة و قلق على ان يريحهم بمساعدة ولو بسيطة

ثم يعود ليظهر امام البعض الاخر بمظهر الملاك الطاهر الذى لم يقترف اثما بحياته سوى

انه برئ الى درجة لاتصدق وانه لا يستطيع تفسير شئ من تصرفات الاخرين الغير اسوياء نفسيا المحيطين به

وانه انسان راقي الطباع طيب رقيق الحاشية

وعندما تكتشف انت خبثه وسوء نيته(بصفتك واحد من الغير اسوياء الغير نقييى السريرة)

يدير عليك الامر ويخرج هو الصادق البرئ الذى لايستطيع تفسير تصرفاتك الغريبة

واخر لايستطيع اخفاء حقده على من هم اكثر منه علما او خلقا او اى صفة اخرى تميز انسان عن اخر

وعند اى ابتلاء يواجه صديقنا المتفوق تفاجئ برد فعل غريب وشماتة والعياذ بالله غير طبيعية

استغفر الله العظيم سعادة لم ارها من قبل سعادة انسان لفشل اخر

مجرد احساس الاخر بالحزن والاسف يشعر هذا الحرباء المشوه نفسيا بالانتشاء والرضا حتى وان لم يكن

نصرا شخصيا له

ولكنها النفس المريضة التى تسعد لشقاء الاخرين دون اسباب واضحة ودون سابق معرفة

هى مجرد امثلة لنماذج قابلتها امامى ولكن للعناية الالهية نماذج بعيدة عنى وعن مدارى الخاص

ولكن تابعتها عن بعد واندهشت من مسارها الغريب فى طريق التلون والخبث والخداع

مع نماذج اقل مايقال عنها انها مريضة وبحاجة للعلاج النفسى الطويل

لماذا بشخصنا نسبب الالم والحزن للاخرين برغم عدم ايذاؤهم لنا؟

لماذا نفضل ان نرى دمعة انسان على ان نرى ضحكة مشرقة او ابتسامة جميلة على وجهه؟

لماذا لا نرد الجميل ونحسن معاملة الناس كما حسنا الاسلام الحنيف؟

اعلم انه لايوجد بيننا ملاك كامل خالى من العيوب

ولكن لا يجب ان نترك انفسنا لتتحول الى وحوش ضارية لا تملك سلاحا سوى الانياب لتحطم

وتؤذى.
ويكفينى الايذاء النفسى كمثال للايذاء ولن اتحدث عن باقى الامثلة فى اى مجال اخر

مهما كانت اهميته

فاكثر ما يؤلم هو الايذاء النفسى له ألم لايضارعه الم,

خاصة لو اكتشفت فجاة ان الحرباء كانت موجودة بالقرب منك طوال الوقت ولا تشعر انت بها

ولم تلحظ لونها الحقيقى وسط طريق من الثقة احطت نفسك به ولم تنتبه اليها

وقالوها زمان مثل بالعامية
قالوا ايه:

"حرس ولا تخون"

وانا شفت واتاكدت انه صح

بس مش معنى كده ان الواحد يوهم نفسه انه مهم اوى والناس كلها حواليه بقت مملكة للحرباية
وهو مصدر اهتمامهم
ومحور احاديثهم وكلهم عايزين يؤذوه
دى تبقى حاجة تانية بيسموها البارانويا
وكمان مش معنى كده
الواحد يخاصم كل اصحابه عشان خايف حد منهم يطلع حرباية
وهو مش عارف (بقى فى بيرسول للحاجات دى)

لكن اقصد الوسطنة فى المعاملة لا كده ولا كده فقط لا نلتفت لتلك النماذج الشاذة

ومعاملتها كما تعامل الاتربة (هوا يعنى زى مااتامر قال نفففففض )

معلش طولت بس بعد موقف شفته واستفزنى فعلا اتكلم عنه

الحمد لله انه بعيد عن حبايبى وعنى بس بردوا مستفز اوى

سلام دلوقتى


Friday, November 30, 2007

ياواد يالعيب!!!!!!!!!!!!!!!فى الجون؟؟؟؟



بالمناسبة ياجماعة صحيح اللى يدخل يقولى بس الاول

عشان يدفع الربع جنيه اشتراك طبعا
Wink

هو انت ممكن تسيب اى حاجة مهما كانت عشان تروح تتفرج على ماتش؟؟؟؟؟

I can`t believe it I can`t believe it I can`t believe it
مش معقول طبعا



ولذلك كلامى لمن يفعل ذلك فقط
ادينى قلت اهوه
دى كانت سبب ثورة جمعاوى (اخ له ارائه التى يجب ان نفهمها جيدا)الحقيقة المرة دى
جيت انزل اجيبله لبس العيد بتاع كل سنتين
غالبا مكون من كرافات وشراب استك منه فيه
والباقى السنة الجيه
لقيت الدنيا فاضية
والمحلات مش شغالة
والناس تقولى فوتى علينا بكره
(هو انا كنت رايحة ابيع لبن؟)
Stay away Stay away
وفجاة تفجر غضب جمعاوى وانسالت دموعه(على اساس انه حسيس موووت)
(بس محدش يقوله انى قولتلكو لاحسن مكانش معاه منديل Wink HaHa Haaahaaa
وقرر انه يقول كل حاجة ويحكى عن تجربته فى هذا المجال
اللى اتضحلى بعدها انها كانت فعلا.........

ولا اقول بعد ماتقروا هتعرفو كانت مجرد ايه
واللى يقرا ويخرج يشد اخر سطر معاه وهو خارج عشان الدنيا ساقعة اوى
Cry

ودلوقتى الميكرفون مع جمعاوى الخطير
(الللى بعد الكلام ده شكل عينه الشمال هتطير)


حوار بين أبو جهل و أبوكيكه



أكيد فى حاجه غلط .. الشارع فاضى مش ممكن ؟! وكمان الطريق سالك .. أمال الناس راحت فين

يارب حد يعدي دلوقتي عشان أسأله بقيت الناس راحت فين ؟!



- انا سامع حد جاى من ورايا ... اول مايعدى جنبى هساله فين الناس

- يا خيبتى دى طلعت قـٌطة معدية

وفجأه وانا ماشى لوحدى فى الشارع زى اللى ماشى على المريخ اخترق سمعى صوت كالرعد (جووووول)



- يعنى ايه الناس اختفت من الشوارع عشان تتفرج على حته ماتش .. صحيـح الفرجة ع الكورة مش عيب بس العيب ان الناس تبقى مش فالحه فى حاجه غير الكورة ومش متابعة لاى اخبار غير اخبار الكورة ومبتفهمش فى حاجة غير الكورة



- أهو فى واحد جاى يجرى من أخر الشارع ...

كابتن كابتن هو فيه ايه ؟ هؤ الناس بتزعق كدة ليه ؟

- قالى : انت مش عايش فى الدنيا الاهلى جاب جون

- قلتله (طبعا وانا باجرى جنبه ) هب هب هب (نفسى اتقطع منك لله) : يعنى الشوارع فاضية عشان ( ماتش كورة ) ايه الهيافه دى

- قالى : متوجعش دماغى انا عاوز الحق الماتش .. انت شكلك كده زبلكاوى ( وطار من جنبى )



ملحقتش اساله عن سر اهتمام شعبنا بالكورة رغم ان مستواها يكسف وكمان ملحقـتـش نفسى قبل ما أتخبط ف عمود النور ومشفـتـش قدامى غير "ابو جهل" بتاع نادى قريش الدولى واقف ع الناصيه مع

"ابوكيكة" بتاع كل النوادى(مفيش داعى للاستناتاجات العبقرية الطابع) وسمعت الحوار ده



أبو جهل : عمت مساءا يا أبا كيكة


أبو كيكة :صباح الفل احنا لسه بالنهار يا أبو جهل انت احتسيت ( ضربت يعنى؟؟؟) كاسين من النبيذ قبل ماتنزل



أبو جهل : معلش اصلها مضلمه عندى من زمان وحتى موبايلى فصل شحن .. لقد رايتك البارحه وانت تصول وتجول . ( عاريا الا من فانلة وشورت وكاب) وتتراكلون من أجل قطعة من الحجر فما اهيفكم(واللاتى والعزوة لاطيحن بكم جميعا ) !!



أبو كيكه : امال لو شفت المشجعين والمصايب اللى بيعملوها هتقول ايه ياجهلولتى ؟



أبو جهل : صحيح احنا كان بنا سفاهه ورقاعة .. يعنى عندك واحد مثلى كنت اصنع الهه من العجوى (مش بحبها خالص يعععععععع)اعبدها ثم اكلها حين اجوع بس مش للدرجه دى
(ياشيخ اتلهى بقى هو فاضل ايه تانى ؟؟؟؟حرام عليك الريجيم عجوى يامفترى؟؟؟؟؟؟؟)


أبو كيكه : انت مشوفتش حاجه يا ابو جهل ناس بتشتم بعضها بالأم(والعياذ بالله) ؟ وناس بطلع صوت وحش من منخيرها(ايه القرف ده بقى ؟) وشنبات برجاله بتتعارك مع بعضها عشان الكورة اللى مش عجباك .. دا حتى لسه واحد مطلق مراته لما عرف انها بتشجع الزبالك(اراهن انه بيستهبل وكان بيتلككلها)



أبو جهل : هناك ما يدور فى شعاب قريش(كلوب حنظله بتاعنا) بانكم قد هاجمتم القافلة البيضاء بالسنج والمطاوى فأخذتم بعيرها وضربتم اميرها وبطحتم راس بنت اميرها .. هو انتوا فكرين نفسكوا ابرهه يابو الشباب ؟!

أبو كيكه : اكيد اللى عمل كده قله مندسه وشرذمة خائنة . كل واحد فيهم هتلاقيه كان شاربله قدحين من الخمر وحابسله نفسين حشيش سيبك منهم دلوقتى .. قولى انت بس ايه اللى حصلوكوا ياعم المرعب .. سمعت انكو ختوا على قفاكم من عمايلكو ال....؟


أبو جهل : متفكرنيش ياعم الحج .. احنا اتضبطنا وخدنا على امة رأسنا .. لدرجة انى قعدت ابكى قبل ما يجيى كرشى اناوباقى الزملاء كما يبكى الفتى منكم معشر لاعبى المستديرة الساحرة اليوم وهو ينظر الى شبكة مرمه المخرومة من كتر اللي شاله .يعنى من الاخر اطحنا .



أبو كيكة : خلاص ملهاش حل غير ان انتوا تلعبوا مع الزبلكوية ما تش واللي يغلب ياخد المركز التالت



أبو جهل : خلاص راحت علينا من زمان يابنى، ... بقولك ايه يالا ما تيجي تلعب في صفوف قريش ده انت تتاكل اكل يافتى هناك وأعطيك سُرة من الدنانير وجارية مليحة و11 ناقة ؟؟
(ااه والله ده المواصلات بقت فظيعة ياابو تريكة وافق يالا انا كما معنديش مانع)
Haaahaaa Haaahaaa Haaahaaa Haaahaaa Haaahaaa

ابو كيكة(مفكرا فى ان يستغل الموقف ويطلب 12ناقة وجاريتين ) : ليه يا اخويا ؟! انت عاوز وانا بلعب معاكوا قدام الطائف أتـنـتـش سهم ولا حربة ولا عين تضيع مستقبلي ؟؟ لا ياعم أنا مش مستبيع

ابو جهلول:تبا لك ايها اللعين (مع ضحكة شيطانية )من تظن نفسك ياواد انت ياواد؟ ده لعيب من عندنا يطحنك يابنى؟ Boo hoo!
ابو كيكة :اللعنة كيف تجرؤ؟؟؟؟؟؟؟؟؟؟ خسئت !!!!!ده لمؤاخذة نضيعكوا و عذرا ياابو الجهلاليل ال ... ادب
^_^ ^_^
(صوت بينادي عليا )

جامعاوي جامعاوي ...انت يامدهول


اااااااااه كان بيحلم فعلا
امال يعنى هيشوف ابو جهل فين؟؟؟هو جمعاوى لسه مرحش النار
الله اعلم بقى
وعشان اصحاب القبضات المتحمسة اللى بيكشروا عن انيابهم دلوقتى وعلى استعداد تام
لاباحة اراقة دمى(ياجماعة مليش دعوة ده جمعاوى I can`t believe it I can`t believe it Sick Sick

انا عن نفسى مش اشرس مشجعى الكورة اللى مش مستديرة خالص
ومتعصبة جدا لنادى المهندسخانة
(وده بردوا على اساس انى بموووت فى الكورة طبعا (
يااما الواحد بيضطر يكذب ويشيل ذنوب عالصبح حفاظا على ماء وجهه لو عدى قدام حد من اياهم وحب ينتقم منه
Sad Sick
وهنا يخرج احدهم قائلا انتوا هتكفروا مشجعى الكورة ياولاد ال....
اكيد مقصدش حد بعينه ولا اقصد انى اقول كده
بس يعنى مطلعش انا بببيع لبن كل ماروح لحد اقضى مصلحة من عنده
يعملى نفسه قاعد يتعبد او يصلى ويقولى فوتى عليا بعد الماتش
حاجة تنرفز والله
لكن ده ميمنعش اننا نشجع النوادى دى بس فى وقت الفراغ يعنى
(اللى عايز بالنسبة لى معنديش فراغ والحمد لله)

Evil Evil Evil
مادام الالعاب الفيديو جاهزة لللعب فى اى لحظة

وكمان مقصدش اى لاعب بالذات خالص على فكرة
كان مجرد مثال برئ للاعب كورة مش اكتر
انا شخصيا لا اكن له اى ضغائن
(قواضى رد الشرف والاصابة بالم نفسى او شرخ عصبى من جراء كلمة جارحة قلتها بقى مااكترها الايام دى
وكمان بقت غالية
Cry Cry Cry

طبعا هنا ممنوع الزعل
لكن بس الى يوصل هنا وميزهقش ويقفل من الاول
يسال نفسه سؤال
هل تشجيع النوادى (اهلى بقى ولا زمالك)يكفى عن كل الاحداث المحيطة
نغمض عينينا عن اى حاجة عشان نتابع الماتش؟؟؟؟؟؟؟؟؟؟؟؟؟؟؟؟؟؟
Wink Wink Wink Wink

يعنى مثلا لو فى فيلم فى السهرة لمحمد فوزى ولا عمنا رشدى اباظه نسيبه ولا ايه؟؟(ده كلام مثلا)
:P :P :P :P
مثلا يعنى
(ملحوظة :بالفعل لا اشجع اى نوادى ولا احمل اى ضغائن نفسية او عقد لنادى بعينه)
تحياتى