بالمناسبة ياجماعة صحيح اللى يدخل يقولى بس الاول
عشان يدفع الربع جنيه اشتراك طبعا
هو انت ممكن تسيب اى حاجة مهما كانت عشان تروح تتفرج على ماتش؟؟؟؟؟
مش معقول طبعا
ولذلك كلامى لمن يفعل ذلك فقط
ادينى قلت اهوه
دى كانت سبب ثورة جمعاوى (اخ له ارائه التى يجب ان نفهمها جيدا)الحقيقة المرة دى
جيت انزل اجيبله لبس العيد بتاع كل سنتين
غالبا مكون من كرافات وشراب استك منه فيه
والباقى السنة الجيه
لقيت الدنيا فاضية
والمحلات مش شغالة
والناس تقولى فوتى علينا بكره
(هو انا كنت رايحة ابيع لبن؟)
وفجاة تفجر غضب جمعاوى وانسالت دموعه(على اساس انه حسيس موووت)
(بس محدش يقوله انى قولتلكو لاحسن مكانش معاه منديل
وقرر انه يقول كل حاجة ويحكى عن تجربته فى هذا المجال
اللى اتضحلى بعدها انها كانت فعلا.........
ولا اقول بعد ماتقروا هتعرفو كانت مجرد ايه
واللى يقرا ويخرج يشد اخر سطر معاه وهو خارج عشان الدنيا ساقعة اوى
ودلوقتى الميكرفون مع جمعاوى الخطير
(الللى بعد الكلام ده شكل عينه الشمال هتطير)
حوار بين أبو جهل و أبوكيكه
أكيد فى حاجه غلط .. الشارع فاضى مش ممكن ؟! وكمان الطريق سالك .. أمال الناس راحت فين
يارب حد يعدي دلوقتي عشان أسأله بقيت الناس راحت فين ؟!
- انا سامع حد جاى من ورايا ... اول مايعدى جنبى هساله فين الناس
- يا خيبتى دى طلعت قـٌطة معدية
وفجأه وانا ماشى لوحدى فى الشارع زى اللى ماشى على المريخ اخترق سمعى صوت كالرعد (جووووول)
- يعنى ايه الناس اختفت من الشوارع عشان تتفرج على حته ماتش .. صحيـح الفرجة ع الكورة مش عيب بس العيب ان الناس تبقى مش فالحه فى حاجه غير الكورة ومش متابعة لاى اخبار غير اخبار الكورة ومبتفهمش فى حاجة غير الكورة
- أهو فى واحد جاى يجرى من أخر الشارع ...
كابتن كابتن هو فيه ايه ؟ هؤ الناس بتزعق كدة ليه ؟
- قالى : انت مش عايش فى الدنيا الاهلى جاب جون
- قلتله (طبعا وانا باجرى جنبه ) هب هب هب (نفسى اتقطع منك لله) : يعنى الشوارع فاضية عشان ( ماتش كورة ) ايه الهيافه دى
- قالى : متوجعش دماغى انا عاوز الحق الماتش .. انت شكلك كده زبلكاوى ( وطار من جنبى )
ملحقتش اساله عن سر اهتمام شعبنا بالكورة رغم ان مستواها يكسف وكمان ملحقـتـش نفسى قبل ما أتخبط ف عمود النور ومشفـتـش قدامى غير "ابو جهل" بتاع نادى قريش الدولى واقف ع الناصيه مع
"ابوكيكة" بتاع كل النوادى(مفيش داعى للاستناتاجات العبقرية الطابع) وسمعت الحوار ده
أبو جهل : عمت مساءا يا أبا كيكة
أبو كيكة :صباح الفل احنا لسه بالنهار يا أبو جهل انت احتسيت ( ضربت يعنى؟؟؟) كاسين من النبيذ قبل ماتنزل
أبو جهل : معلش اصلها مضلمه عندى من زمان وحتى موبايلى فصل شحن .. لقد رايتك البارحه وانت تصول وتجول . ( عاريا الا من فانلة وشورت وكاب) وتتراكلون من أجل قطعة من الحجر فما اهيفكم(واللاتى والعزوة لاطيحن بكم جميعا ) !!
أبو كيكه : امال لو شفت المشجعين والمصايب اللى بيعملوها هتقول ايه ياجهلولتى ؟
أبو جهل : صحيح احنا كان بنا سفاهه ورقاعة .. يعنى عندك واحد مثلى كنت اصنع الهه من العجوى (مش بحبها خالص يعععععععع)اعبدها ثم اكلها حين اجوع بس مش للدرجه دى
(ياشيخ اتلهى بقى هو فاضل ايه تانى ؟؟؟؟حرام عليك الريجيم عجوى يامفترى؟؟؟؟؟؟؟)
أبو كيكه : انت مشوفتش حاجه يا ابو جهل ناس بتشتم بعضها بالأم(والعياذ بالله) ؟ وناس بطلع صوت وحش من منخيرها(ايه القرف ده بقى ؟) وشنبات برجاله بتتعارك مع بعضها عشان الكورة اللى مش عجباك .. دا حتى لسه واحد مطلق مراته لما عرف انها بتشجع الزبالك(اراهن انه بيستهبل وكان بيتلككلها)
أبو جهل : هناك ما يدور فى شعاب قريش(كلوب حنظله بتاعنا) بانكم قد هاجمتم القافلة البيضاء بالسنج والمطاوى فأخذتم بعيرها وضربتم اميرها وبطحتم راس بنت اميرها .. هو انتوا فكرين نفسكوا ابرهه يابو الشباب ؟!
أبو كيكه : اكيد اللى عمل كده قله مندسه وشرذمة خائنة . كل واحد فيهم هتلاقيه كان شاربله قدحين من الخمر وحابسله نفسين حشيش سيبك منهم دلوقتى .. قولى انت بس ايه اللى حصلوكوا ياعم المرعب .. سمعت انكو ختوا على قفاكم من عمايلكو ال....؟
أبو جهل : متفكرنيش ياعم الحج .. احنا اتضبطنا وخدنا على امة رأسنا .. لدرجة انى قعدت ابكى قبل ما يجيى كرشى اناوباقى الزملاء كما يبكى الفتى منكم معشر لاعبى المستديرة الساحرة اليوم وهو ينظر الى شبكة مرمه المخرومة من كتر اللي شاله .يعنى من الاخر اطحنا .
أبو كيكة : خلاص ملهاش حل غير ان انتوا تلعبوا مع الزبلكوية ما تش واللي يغلب ياخد المركز التالت
أبو جهل : خلاص راحت علينا من زمان يابنى، ... بقولك ايه يالا ما تيجي تلعب في صفوف قريش ده انت تتاكل اكل يافتى هناك وأعطيك سُرة من الدنانير وجارية مليحة و11 ناقة ؟؟
(ااه والله ده المواصلات بقت فظيعة ياابو تريكة وافق يالا انا كما معنديش مانع)
ابو كيكة(مفكرا فى ان يستغل الموقف ويطلب 12ناقة وجاريتين ) : ليه يا اخويا ؟! انت عاوز وانا بلعب معاكوا قدام الطائف أتـنـتـش سهم ولا حربة ولا عين تضيع مستقبلي ؟؟ لا ياعم أنا مش مستبيع
ابو جهلول:تبا لك ايها اللعين (مع ضحكة شيطانية )من تظن نفسك ياواد انت ياواد؟ ده لعيب من عندنا يطحنك يابنى؟
ابو كيكة :اللعنة كيف تجرؤ؟؟؟؟؟؟؟؟؟؟ خسئت !!!!!ده لمؤاخذة نضيعكوا و عذرا ياابو الجهلاليل ال ... ادب
(صوت بينادي عليا )
جامعاوي جامعاوي ...انت يامدهول
اااااااااه كان بيحلم فعلا
امال يعنى هيشوف ابو جهل فين؟؟؟هو جمعاوى لسه مرحش النار
الله اعلم بقى
وعشان اصحاب القبضات المتحمسة اللى بيكشروا عن انيابهم دلوقتى وعلى استعداد تام
لاباحة اراقة دمى(ياجماعة مليش دعوة ده جمعاوى
انا عن نفسى مش اشرس مشجعى الكورة اللى مش مستديرة خالص
ومتعصبة جدا لنادى المهندسخانة
(وده بردوا على اساس انى بموووت فى الكورة طبعا (
يااما الواحد بيضطر يكذب ويشيل ذنوب عالصبح حفاظا على ماء وجهه لو عدى قدام حد من اياهم وحب ينتقم منه
وهنا يخرج احدهم قائلا انتوا هتكفروا مشجعى الكورة ياولاد ال....
اكيد مقصدش حد بعينه ولا اقصد انى اقول كده
بس يعنى مطلعش انا بببيع لبن كل ماروح لحد اقضى مصلحة من عنده
يعملى نفسه قاعد يتعبد او يصلى ويقولى فوتى عليا بعد الماتش
حاجة تنرفز والله
لكن ده ميمنعش اننا نشجع النوادى دى بس فى وقت الفراغ يعنى
(اللى عايز بالنسبة لى معنديش فراغ والحمد لله)
مادام الالعاب الفيديو جاهزة لللعب فى اى لحظة
وكمان مقصدش اى لاعب بالذات خالص على فكرة
كان مجرد مثال برئ للاعب كورة مش اكتر
انا شخصيا لا اكن له اى ضغائن
(قواضى رد الشرف والاصابة بالم نفسى او شرخ عصبى من جراء كلمة جارحة قلتها بقى مااكترها الايام دى
وكمان بقت غالية
طبعا هنا ممنوع الزعل
لكن بس الى يوصل هنا وميزهقش ويقفل من الاول
يسال نفسه سؤال
هل تشجيع النوادى (اهلى بقى ولا زمالك)يكفى عن كل الاحداث المحيطة
نغمض عينينا عن اى حاجة عشان نتابع الماتش؟؟؟؟؟؟؟؟؟؟؟؟؟؟؟؟؟؟
يعنى مثلا لو فى فيلم فى السهرة لمحمد فوزى ولا عمنا رشدى اباظه نسيبه ولا ايه؟؟(ده كلام مثلا)
مثلا يعنى
(ملحوظة :بالفعل لا اشجع اى نوادى ولا احمل اى ضغائن نفسية او عقد لنادى بعينه)
تحياتى
4 comments:
أخيييييييييييييرا عرفت مين اللى بيكتب جمعاوى اللى اصحابى بيقولولى عليها على طول
:)
أسلوب ممتاز زى ما سمعت عنه دايما
تحياتى
-------
طبعا لازم تلاقى الشوارع فاضية طول ما الجهلاوية فى القهاوى
احمدى ربنا ان الجهلى اتغلب والا كان جمعاوى مش هيعرف يمشى فى الشارع أصلا
ههههههههههه
طلع مين بقى اللى بيكتبه !!!!!!
انا كمان نفسى اعرفها
ميرسى جدا على ذوق حضرتك
بس واضح بقى ان حضرتك زملكاوى عتيد
مهو كمان الزمالكاوية بيقعدوا على القهوة
بس مش كتير عشان الضغط منتشر جدا فى مصر
الحمد لله فعلا لان الخطر كان عليا انا مانا اللى كنت بشترى برده
شكرا لتعليقك يادكتور
ملحوظة بس بكررها تانى عن جمعاوى كتوضيح :النص الاصلى مش من تاليفى
لكن المونتاج بعمله كامل مع الاضافات تتخلل النص ونزع العبارات الغير لائقة
واستبدالها باخرى زى مابيقولوا للحدق اللى هيفهم
اكرر شكرى لمرورك يادكتور واتمنى يعجبك جمعاوى
ليه دايما بتهاجموا الكورة
اولا انا شايف ان في ميزة في حكاية ان الناس تتجمع على ماتش كورة
الناس بطلت تتجمع مع بعض على حاجة
الناس ابتدت يبقى بينها مسافات
من ميزة الكورة
او الافلام
او المسرحيات
او الحفلات
انها بتجمع الناس
و دي حاجة جميلة جدا
و بتخلي يبقى فيه تواصل ما بين الناس
انما لو هنهاجم الكورة علشان الخناقات اللي ممكن تحصل بسببها فانا شايف ان المشكلة مش في الكورة
المشكلة فينا احنا
احنا بقينا صدرنا ضيق
مفيش حد فينا طايق اللي جنبه
و دي مش مشكلة الكورة
دي مشكلتنا احنا
على العموم انا في النهاية شايف ان احنا المفروض نشجع اي حاجة ممكن تجمع الناس مع بعض
سلام
يادكتور
اسمحلى بعد اذنك اوضح يظهر ان حضرتك بس مركزتش فى الكلام اللمعنى بيه الموضوع
المقصود من كل ده حاجة واحدة
مش هجوم ولا حاجة لانى وضحت اكتر من مرة انى مش ضد الكورة بصفة عامة
ولا ضد اى نادى بصفة خاصة
بس قصدى ناخد بالنا ان الحياة حولينا مليانة مشاكل اكبر بكتير لازم مانغميش عينينا عنها بالكورة والتجمع حوليها
مش بس خناق اذا كان ده اللى مضايق حضرتك بس
نلاحظ بس ان مع كل مصيبة كبيرة تستحق اننا نفوق ونتحرك ييجى ماتش ويحضره فلان والسيد فلان والسيد المحترم علان اعتقد دى مش بتيقى صدفة
يعنى اصبحت الكورة تحل محل المخدرات
كل ماارادوا اسكات صوت الجماهير هو الماتش الحل التمام
ده غير بقى الحفلات الخيرية فى مارينا واللى طبعا بتجمع كل الناس
بس لو شئنا وسيلة لتجميع الناس دون افقادهم عقولهم وادراكهم للواقع وبدون خناقات كمان مهم بيتجمعوا فى المساجد والنوادى والشغل وفى بيوت بعضهم على سبيل السهرات اللى كل فترة بتكون موجودة فى بيوتنا
لكن ايه اهمية الكورة اللى يصرف عليها ملايييين لا حسر لها والالاف الشباب عاطل بحاجة الى ربعها لحل مشاكله
تبقى وسيلة تزجية الوقت الفارغ ماشى لكن تسيطر على عقول الناس كلها لا
تضيع منهم وقت شغلهم وتخليهم يسيبوا اعمالهم ورزقهم بردوا لا
غير كده انا مليش ملاحظات على الكورة
شرفتنى يادكتور بمرورك وردك
وكالعادة اوضحلك بس
اختلاف الراى لا يفسد للود قضية
Post a Comment