مييييييين جمعاوى ده اصلا؟؟؟؟؟؟؟؟
جمعاوى ده يبقى العفريت بتاعى
مش تهرييييج ولا سرح
بس عفريت ايه بقى
عفريت ابن عفريته
يعرف يجيبلى اى حاجة
حتى لو لبن العصفور
بس مش عفريت زى بتاعة "شبيك لبيك عبدك وملك ايديك"
ولا حتى بتاع اؤمر واتئنعر انجعص واتمنظر"
ده عفريت شكله زىى وزيكوا(ولا مؤاخذة يعنى)
من غير دهشة مهو فى عفاريت كتير وسطنا ومنهم من يرتدى البدلة والكرافات وعلى مكاتب
بس عفريتى انا مختلف فهو عفريت ابن بلد فعلا ضد الفساد زى ماهو بردوا
ضد الميه ضد النار ضد الحشرة ضد الفار
عفريت عنده نفس الافكار اللى ممكن تدور فى ذهن اى شاب فى سننا
وبما انى بحب اللعب اوى والضحك والافلام بتاعة زمان
كان اول ماخطر على بالى عند استحضار العفريت جمعاوى
ان يقوم بدور مراسل صحفى وبث مباشر من
ايام زوزو نبيل مكانت بتعمل الف ليلة وليلة
 |
قولى يازوزو يختى قولى : بلغني أيها الملك السعيد ذو الرأي الرشيد..إنه كان فيه ملك شديد قاعد في بلد بعيد(مش بعيد اوى على فكرة )..جلس ذات يوم أمام مرآته وحيد..وسألها السؤال الجديد... -قوليلي يا مرايتي..مين أحسن ملك(رغم ان معدش فى ملك فى البلد دى) في الدنيا؟؟ -أنت طبعاً يا مولاي..(صباحو كدب) -طيب ومين أغنى ملك في الدنيا؟؟ -أسأل بنوك سويسرا..حتقولك أنه أنت برضه يا مولاي(انا بردوا اللى هقولك يامفترى ياظالم) -طيب مين بقى أقوى ملك في الدنيا؟؟(نياهاهاهاهاههاهاهاهاهاهاهاهاها آل يعنى انا مش عارف) -وبعدين معاك..أنت شكلك فاضي يا مولاي..برضه أنت يا مولاي أمال العيال بتوع المظاهرات متنفخوش ولا اتعذبوا إلا في عهدك الزاى يعنى (ده انت الشيطان قدامك تلميذ اهبل من بتوع كى جى 2 يامولاى) -طيب قوليلي يا مرايتي أجيب مين بعدي؟؟ -يا مولاي هو الشعب ده ورث من أمك..ما تسيبه هو ونصيبه..اللي يحكمه يحكمه..إن شالله يقعد كده عانس من غير حاكم..وأنت مالك يا مولاي (ده ايه الهم ده هو انت مش عاتق حى ولا ميت) -لا يا مرايتي..دي أمانة حمّلها لي التاريخ..وأنا لا يمكن أتخلى عن الأمانة دي..لا حي ولا ميت..أنا مقاتل..والمقاتل ما يهربش من المعركة أبداً..(ياراااااااااااجل!!!!) -خلاص يا مولاي هات "ابن الوز" وصاحبه "عز" يحكموها.. -برافو عليك يا مرايتي.. -قوليلي يا مرايتي..هو أنا ليه وداني طويلة؟؟(ده تسأل فيه حد متخصص فى الثروة الحيوانية).او(عربجى قديم) -عشان طول النهار بتسمع لشكاوي الناس يا مولانا.. -طب ليه كرشي واسع كده؟؟..أصلي الناس بيقولوا ده من كتر مالهم اللي كالته -قطع لسانهم يا فندم..ده شوية انتفاخ..خدلك أنت بس حبتين ديسفلاتيل وأنت هتبقى زى الفل..(ولو انى شايفة ان شوية جاز مع صابون سايل هيحلوا المشكلة تماما) -طب ساعات بحس بحرقان في البول -يا مولانا أنا مراية مش دكتور مسالك..ده إيه النفخ ده يا ربي.. -طب خلاص..بس قوليلي كل يوم بتحصل في المملكة مصيبة..ناس بتغرق وناس بتنحرق في حوادث قطارات..هو أنا صحيح نحس يا مرايتي؟؟ -فشر يا فندم..ده هو اللي شعب فقري ابن(....) مش عارف يموت -طب سؤال أخير يا مرايتي..أنا أمرت إنهم يحطوا صورتي في كل حتة..بس ماقلتلهمش يحطوها على الجبنة المثلثات بتاعة العيال... -لأ يا فندم هما حطوها عشان العيال ماكنوش يرضوا يا كلوا الجبنة..فحطوها عشان يقوللهم اللي مش حياكل حيبقى زي عمو..،بس أنا كان لي طلب عند سيادتك.. -قولي يا مرايتي -الهانم حرمك..كانت مانعة جيمي ابن سيادتك يلعب بالكورة قدامي عشان خايفة أتكسر..قولها خصيمك النبي يا شيخة..خليه يلعب عشان اتكسر ولا أروح في داهية..أحسن من ما أشوف كل يوم النحس أبو كرش مترين قدامه ده. -إيه ده..هو في حد بيقف قدامك غيري -لااااااااااااااااااااااا حراااااااام بقى يامولاى(صوت تشققات سطح المرايا ودوى عنيف بعد انفجارها لسبب غير معلوم!!!!!!!!!!!!!!!!) من أحد ممالك ألف ليلة نقله إليكم: الجنى: جمعاوى |
ياترى جمعاوى كده عفريت تمام ولا كان ممكن يعملشغل جامد عن كده
واشمعنى اختار الحلقة دى من الف ليلة وليلة
عشان ينقلهالنا
الله اعلم
مهو اكيد حضر كتير وعارف اللى ممكن
يجيبه عشان يقنعنى بقدراته كعفريت
كل ده عشان يبقى عفريتى الخاص فى مقابل كارت شحن 50 وكوزين دوم كل شهر !!!!
يظهر العفاريت مش لاقية شغل هى كمان
والسلام ليس ختام
2 comments:
ماتوديناش فى داهيه هو الكلام على مين بالظبط !
هههههه أسلوب عرضك للمواضيع من أجمل ما يكون وإلى الأمام دوما وبلاش كلام فى السياسه وخلينا فى الطب أحسن هههه
هههههههههههههههه
الكلام على ال.....الخيال العلمى اللى مش ممكن يحصلنا والحمد لله
ميرسى جدا يادكتور على اطرائك الجميل
اسعدنى تعليقك جدا
بس دى مش سياسة
(بس مش هحلف طبعا )
دى حكايات زى اللى جدتى كانت بتحكيهالى زمان
بتعلم بس عشان المستقبل
مستقبل الناس اللى هحكيلهم حكايات يعنى (ولو انى مش متاكدة احكيلهم ايه ولا ايه)
خلينا فى الطب ماشى
عجبنى جدا اسلوب مدونتك بردوا يادكتور الى الامام انت ايضا
Post a Comment