يانجف بنور ياسيد العرسان
اكتشفت النهاردة بس انى بجد بعتبر صحابى زى اولادى فعلا
يعنى انا طبعا مجربتش شعور الامومة لسه بس يعنى اكيد هيكون كده
كده اللى هو ايه؟
سؤال وجيه فعلا
كده اللى هو انى شفت وحضرت فرح صديقتى او بمعنى أصح اول صديقة ليا
من اكتر من 14 سنة ومن وقت ماكنا مع بعض بندرس سوا
وارتبطنا بصداقة جميلة الحمد لله استمرت لوقت كتابة هذه الكلمات
بجد كان يوم رائع
على الرغم من معرفتى ميعاد الفرح من اكتر من شهرين
بس متصورتش فرحتى بيها هتبقى كده وشكلها فى فستان الفرح
كنت دايما بتصور ان العروسة فى فستان الفرح دى حاجة اسطورية
احساس انها حاجة مش موجودة كتير وهالة من الابهار تحيط بيها
وكل الناس واقفة بتتفرج وهى نازلة من عربيتها
والزفة
حسيت ساعتها
انى عايزة اضرب عريسها بس الحمد لله مضربتوش طبعا
يعنى حسيت انه خدها مننا احنا اصحابها
وفضلت واقفة اتفرج لحد ماطلعت قاعة الفرح مع عريسها وانا كل ده مش مصدقة واصحابى بيشدونى
وانا بتحرك معاهم كده بتوفيق ربنا كانى انفصلت عن العالم اللى حوليا
بس اول مادخلنا ومع الرقصة السلو اياها اللى بقت تقليد فى اى فرح
لقيت عينى بتدمع
وكنت هقلبها نكد بقى وشغل افلام من بتاعة امينة رزق
يعنى كأننى مامتها مش مجرد صاحبتها
كان يووم رائع فعلا مش مجرد يوم اكيد مش هنساه
اول فرح لواحده صديقتى اوى اوى واتجمعنا شلة واحدة وكلنا جوانا احساس واحد
سعادة كبيرة جدا بصديقتى أو اختى بتتجوز وداخلة عالم جديد لسه مجربناهوش
مع طبعا رغبة تانية خبيثة دبرناها كلنا اصحابها
من دافع المزاح التقيل بتاع الاصحاب
وقلنا لازم نعمل فيها مقلب تفتكره طول عمرها وليلة فرحها وفى نص الفرح
تفاصيل المقلب طبعا عشان تم تدبيرها فى الخفاء هتظل فى الخفاء علطول
لعدم امكانية البوح بيها
ولكن يمكن تخيلها بقليل من الخيال وخصوصا للى مجرب مكر البنات ومقالبهم
يعنى بالاضافة انه مقلب متدبر له من فترة طويلة فيمكن تخيله بقليل من الحدس
بس من الممكن نقول اننا ضحكنا جدا واحنا بنفذ كل كلمة اتفقنا عليها
وخاصة مع رد فعلها المضحك لما اتفاجات باللى عملناه
واللى كان جزء منه اننا خليناها تعتقد انها كفقرة اساسية فى الفرح
وضرورية (آل بقى حاجة زى التقاليد كده)انها هتغنى اغنية وترقص عليها لوحدها
وكلنا طبعا بنكلمها ووجوهنا مدارة من الضحك وصدقتنا المسكينة
الفظيع بقى انها اصيبت برعب غريب وكادت عينيها تدمع وكانها بتدافع عن مصر
وبتقول( لا)وبتكررها بدون انقطاع زى الدمية اللى خلصت البطارية بتاعتها
وضبطنا مع بتاع الدى جى كل حاجة
ولن انسى رد فعلها عندما اكتشفت انها مجرد مزحة سخيفة مننا كعادتنا معاها
ولكن الجديد كان ان رد الفعل بتاعها ده شاهده كل من بالفرح
كان يوم بالفعل يستحق التسجيل بالنسبة ليا طبعا
فرحت فيه اوى
وعرفت اكتر قيمة اصحابى بعد ماجربت الشعور الجميل اللى حسسيته هذه الليلة
يارب بقى كل صحباتى يتجوزوا ويقدرنى ربنا بحضور أفراحهم قريب
7 comments:
جميل قوووى يا دكتوره شرين؟
صح ولا غلط
انا تخمينات صح دايما
ههههههههه
وربنا يديم عليكم صحبتكم و عقبالك ويكون احلى فرح
عجبنى قوى تصويرك انكم كنتو فرحانين زى ما تكون بنتكم
بجد ده شعور حقيقى
خصوصا لما تكون صحبتك من الطفوله
انا صحباتى اللى من الطفوله اتجوزو كلهم
ماعدا اكتر واحده بحبها
كل ما يجلها عريس اطفشه
اطلع فيه اى عيب علشان تقعد معايا فى مشوارى الطبى اللعين
هههههههههههههههههه
ومبروك مره تانيه وعقبالك
ميرسى يادكتورة منى
وعقبالك ان شاء الله انتى كمان قريب
وشكلنا هنكمل مشوارنا الطبى اللعين كلنا لانى قايمة مع نفسى بنفس الدور اللى بتعمليه مع صحبتك وبطفش الناس عشان المشوار اياه يكمل على خير
الله يبارك فيكى ويالا فرحينا بيكى قريب بقى
ما شاء الله
احسد على روحك الجميله ديه
ربنا يكرمك انتى واصحابك ويخليكم لبعض على طول
جميل د.شرين
ربنا يخليك صحباتك وعقبالك انتي كمان ان شاء الله
:)
هههههههه
نفس احساسى فى افراح صحباتى فى من ثانوى
كنت ساعتها حاسة انى ام البنات
وبالذات لما كانت التانية بتتجوز والاولى حامل
بصيت لهم فعلا وكانت الدموع فى عينايا
لكن مقالب من النوع بتاعكم ده
ابدا يابنتى ولا حتى هزار
مااقدرش
انا بحب اهزر واعمل حاجات كده بس على قدى
هههههههههه
ربنا يكرمك يادكتورة شيرى
;)
دكتورة نور:
ماشاء الله عليكى انتى ياجميلة
بيعجبنى روحك انتى الجميلة وربنا يحميكى
ويخليلك اصحابك انتى كمان ياااااارب
واشوفك عروسة زى القمر يارب
(بس بردوا اشوفك دكتورة قد الدنيا)
عن قريب باذن الله
Snow Princess:
ميرسى جدا ليكى يادكتورة اعتقد ايمان؟
ولا انا غلطانة
اكيد اتشرفت جدا بزيارتك لمدونتى البسيطة
ربنا يكرمك يارب
ويخليلك اصحابك (اللى اعتقد انهم كل الناس بسبب روحك الجميلة دى)
انا اصلى زرت مدونتك وقريت معاكى عنك
وعقبالك ياحلى دكتورة تبقى كمان احلى عروسة
ياهلا ياهلا
ازيك ياقمر
ولا نقول يا أم البنات
بما ان موقفنا واحد فى النقطة دى يعنى
والله ياهوبة الحكاية دى ادهشتنى جدا الاقى يابنتى الناس وصحابى مبسوطين اوى وبيضحكوا
وانا مجرد مابدؤا يرقصوا سلو لاقتنى نازلة عياط ودموعى طالعة تجرىوبوزت الميك اب(يمكن ده سبب زيادة الدموع اكيد حسيت ان شكلى اتلخبط)
وليا صحبة حامل اما بشوفها مش بصدق نفسى وبحس انى اصغر من العالم العجيب ده
(انا اكيد اصغر طبعا بس الناس مش واخدة بالها)
اما عن المقالب فحدثى ولا حرج انا بكل تواضع اكبر حد يعمل مقالب هنا متعهد المقالب بتاع الافراح
كمية الشر اللى جوايا فى النقطة دى كبيرة جدا
لدرجة انى عارفة انى فرحى مش هيبقى عادى(لو فى نصيب فى فرح اصلا)
هيبقى عروض من السيرك من كتر مااصحابى بيتوعدونى يردولى جمايلى معاهم
الواحد خايف ياهبة ومش عارفة اعمل ايه
بحب تدبير المقالب ولحظة التفكير فيها اكتر لحظة بفرح فيها جدا واقعد اضحك اوى وانا بوظبها
وحاجات افظع من انها تتقال قدام الناس علنيا افعالى كلها بشعة ربنا مايوريكى
بس ده مايمنعش انى اقولك يارب اشوفك عروسة عن قريب
وتعزمينى هيه؟
اوعى تنسينى ولا تخافى اعمل حاجة
هبقى طيبة معاكى والله
احنا نحبو نريحوكى ياشابة
Post a Comment