مصر هى امى
(بس مش امى انا لوحدى طبعا عشان محدش يتفاجئ
بالقرابة دى ويفتكر بقى عندى كوسة من نوع جديد)
قالوها كده من واحنا صغيرين
(مصر هى امى واللى يجيب سيرة امى .......)
قالها المؤرخ الكبير اوى طلعت زكريا
بس ياترى فعلا اللى يجيب سيرتها
هعمل فى ايه اكيييد مش هسلم عليه
واهو جاب طيب اعمل ايه
اما تسمع بلدك وبلد كل الناس دى بتتشتم قدامك ومتقدرش تعمل حاجة
ليه عشان خايف
من ايه ؟
مش عارفة بس الخوف بقى شئ طبيعى فى مجتمعنا
ليه او من ايه مش عارفة بالضبط بس طلعنا كده
يعنى على سبيل المثال
راكبة تاكسى عادى زى اى تاكسى عادى وزى باقى المواطنين الشرفاء الصالحين
مع سواق شكله محترم(ده اللى كان باين عليه من بره)
بس المظاهر خداعه
فاذا بيه مخنوق منى
ليه
عشان ركبت من قدام الحزب
واانا مالى ياعم
متعرفوش
المهم عمال يستفزنى عشان اتكلم معاه عن اوضاع البلد
وانا فى التراوة
مزيد من الاستفزاز
قلت انا ايه
قلت ياواد طنش خااااااااااالص
شويه وبدات الحاجة اللى حرقت دمى وفورت دمى
ابتدى يشتم البلد بالفاظ اقل مايقال
عنها انها بذيئة جدا
ومكنش ينفع يقولها قدام حد محترم بغض النظر انه يقولها قدام بنت
بس تقريبا الموضوع ده مفرقش معاه كتير
اللى لاحظته انه كان معتبرنى
جاسوسة
وعميله
مش فاهمة ليه
وكلامه عن البلد !!!!!
الزاى حد يشتم وطنه كده
يعنى بيشتم نفسه
هو الوطن ايه؟؟؟؟؟؟
مش حكومة
ولا مكان
الوطن احنا الناس كلها اللى فى
انا وانتوا وابئنا وامهاتنا وقرايبنا
الشعب كله
يبقى ليه اشتم بلدى
فى حين كان بيموت كل يوم زمان الالاف عشان
يرفع علم مصر على بقعة صغيرة من ارض مصر
ولا احنا مش هنحب البلد الا لو محتلة
مين اللى كان بيمشى فى المظاهرات
مين اللى كان بيعمل جماعات ضد المحتلين
فين الناس دى؟؟؟؟؟؟؟؟؟؟؟؟؟
مش كانوا المصرييين
امال احنا ايه
؟؟؟؟؟؟؟مش مصريين بقينا بنشتم فى البلد اللى عايشين فيها
بدل ماكل واحد يصلح غلط كله بيرمى على بعضه
والاخر نشتم البلد
ده طبعا كان بيتخلله مزيج بشع
من الدعاء والشتيمة فى العربيات المجاورة
وياحبذا لو واحدة بنت او مدام اللى سايقه
الظريف بقى انه بيقول كلام فظييع جدا
كله ده ومعتبر انه مركب معاه
كيس هوا وراه او مجرد بالونة قاعدة
مفيش مشاكل
بس طبعا على الرغم من اعتراضاتى البطولية
كانت مجرد افكار غاضبة بتدور فى مخيلتى
لم اجرؤ على البوح بها
لان طبعا كان لازم اسمع كلام الكبار
متركبيش تاكسى لوحدك
لو ركبتى
متعنديش وتقفلى دماغك معاهم عشان ربنا يكرمك وتوصلى بالسلامة
وبعد كل اللى عمله فى المشوار اللى مايعلم بيه الا ربنا ده
وقفنى بعيد عن المكان اللى كنت هنزل عنده
مع نظره كان ليها مفعول السحر انى مفتحتش بقى ونزلت فورا
(اكيد ماكنتش نظرة دباحة كما يحلو للبعض ان يتصور)
كان شبه سمكة قرش حد عضها وطالعاله توريه شغله
لا والمستفز بقى
انه كل ده وكان مشغل الكاسيت بتاع العربية
على ايه؟؟؟؟؟؟؟؟؟؟؟
لا مش قرآآآآآآن (بعد كل الشتيمة دى يعنى؟؟؟)
كان رومانسى جدا ومشغل
آل ايه
جورج وسوف اغنية اه ياليل العاشقين
آل ليل العاشقين آل
حسبى الله ونعم الوكيل
No comments:
Post a Comment